دوه د مهاجرت وکیلان: مهاجرین باید د شړلو مخنیوي لپاره خپل قانوني وضعیت بدل کړي!

د ډونالډ ټرمپ د حکومت د مهاجرتي پالیسیو د کالیفورنیا افغان مهاجرین، په ځانګړې توګه هغه کسان چې قانوني اسناد نه لري، له جدي اندېښنو سره مخامخ کړي دي.

په همدې موخه، په سکرمنتو کې د مهاجرینو لپاره یوه حقوقي پوهاوي غونډه جوړه شوه، چې هدف یې د هغوی د حقوقي وضعیت په اړه معلومات ورکول وو.

دا غونډه د جیره کالیفورنیا له خوا د پروژه انار او د افغان امریکايي ټولنیز سازمان په همکارۍ ترسره شوه. په دې ناسته کې د مهاجرت دوو وکیلانو د مهاجرینو د اخراج د مخنیوي لپاره حقوقي میکانیزمونه تشریح کړل.

سلیمان راحل، چې د جیره کالیفورنیا اجرائیه رئیس دی، وویل چې د دې پروګرام موخه دا ده چې مهاجرینو ته دقیق حقوقي معلومات ورکړل شي، څو د هغوی د مهاجرت بهیر له نورو ستونزو سره مخ نشي.

په دې غونډه کې د مهاجرت وکیلانو، اسپوژمي نصیري او سارا کوهگدای، هغو مهاجرینو ته د وضعیت د بدلون حقوقي شرایط او د نویو مهاجرتي ننګونو پر وړاندې د مبارزې لارې چارې بیان کړې چې قانوني اسناد نه لري.

اسپوژمي نصیري وویل چې هغه مهاجرین چې خپل پروولي وضعیت یې نه دی بدل کړی یا د جرم سابقه لري، د اخراج له خطر سره مخ دي.

هغې زیاته کړه چې د اخراج د مخنیوي لپاره مهاجرین باید دوه مهم اقدامات ترسره کړي، چې یو یې د خپل قانوني وضعیت بدلول دي، لکه د پناهندګۍ یا مؤقتي محافظت لپاره غوښتنلیک ورکول، او بل د هر ډول جرمي فعالیت څخه ډډه کول.

نصیري وویل چې د ټرمپ د حکومت پر مهال د ټولو مهاجرتي پروسو، لکه د ګرین کارت غوښتنې او د پناهندګۍ دوسیو ارزونه، د پخوا په پرتله ډېر وخت نیسي.

په همدې حال کې، د مهاجرت وکیلې سارا کوهگدای وویل چې هغه کسان چې له بشري وضعیت سره امریکا ته راغلي، باید د پناهندګۍ یا مؤقتي محافظت لپاره غوښتنلیکونه وړاندې کړي.

هغې ټینګار وکړ چې ځینې ځانګړي افغان مهاجر د اخراج له خطر سره نه دي مخ، خو هغه کسان چې د جرم سابقه لري او د خپل قانوني وضعیت د بدلولو لپاره یې اقدام نه دی کړی، له جدي خطر سره مخامخ دي.

په دې ناسته کې دغو دوو وکیلانو د غیر قانوني مهاجرینو د حقوقي پوښتنو ځوابونه ورکړل او هغوی ته د مهاجرتي دوسیو لپاره حقوقي مشورې ورکړې.

له هغه وروسته چې ډونالډ ټرمپ د امریکا د ولسمشر په توګه واک ته ورسېد، د مهاجرت د محدودولو لپاره یوه لړۍ اجرائیوي فرمانونه صادر شول، چې پکې د مهاجرینو ډله‌ییز اخراج هم شامل و. دغه اقدامات د مهاجرینو په ټولنو کې، په ځانګړې توګه د غیر قانوني مهاجرینو ترمنځ، جدي اندېښنې راپورته کړې دي.