سپوژمی نصیری: تازه راغلی مهاجرین دې د ټرمپ د حکومت د مهاجرتی ستونزو لپاره چمتو واوسی

د افغان مهاجرینو لپاره د حقوقی پوهاوی سمینار او د ټرمپ د حکومت د مهاجرتی پالیسیو لپاره چمتووالی، په حضوری او آنلاین بڼه د کالیفورنیا ایالت په پلیزنتن ښار کې ترسره شو.

دا غونډه د افغان-امریکایی ټولنیز سازمان له لوری د خلیج ختیځې سیمې د مسلمانو ټولنیز مرکز کې تنظیم شوې وه، چې پکې یو شمېر تازه راغلی افغان مهاجرین، چې د آلامدا ولسوالۍ اوسیدونکی دی، برخه اخیستې وه.

عمر عزیز، د افغان-امریکایی ټولنیز سازمان اجرائیوی رئیس، د دې سمینار هدف د تازه راغلو مهاجرینو د قانونی پوهاوی زیاتول وبلل. هغه وویل چې دا غونډه د مهاجرینو لپاره ګټوره وه، څو خپل حقوق وپیژنی او هغه اقدامات ترسره کړی چې د دوی قانونی وضعیت ته خوندی پاتې شی.

سپوژمی نصیری، د مهاجرتی چارو وکیله، د دې سمینار اصلی ویناواله وه. هغې په ځانګړی ډول هغو مهمو ټکو ته اشاره وکړه چې د مهاجرینو لپاره د قانونی حضور لپاره اړین دی. نصیری خبرداری ورکړ چې د ټرمپ د واکمنۍ پر مهال به د مهاجرت وضعیت لا پیچلی شی، او مهاجرین باید د لا زیات محدودیتونو او د خپلو قضیو د ارزونې د اوږده بهیر توقع ولری.

هغې زیاته کړه چې د خپل قانونی موقف د ساتلو لپاره، تازه راغلی مهاجرین باید د خپلې بشری ویزې د تمدید، د پناه غوښتنې، او د استوګنې دایمی اسنادو ترلاسه کولو ته جدی پاملرنه وکړی. دا اقدامات به هغوی ته دا اسانتیا برابره کړی چې خپل قانونی موقف وساتی او په متحده ایالاتو کې د پاتې کېدو قانونی حق ولری.

سپوژمی نصیری د تازه راغلو مهاجرینو هغه اندېښنې هم یادې کړې چې له امریکا څخه د احتمالی ایستلو په اړه یې لری. هغې وضاحت ورکړ چې د امریکا د مهاجرتی قوانینو له مخې، د مهاجرینو د اخراج بهیر اوږد دی، او یوازې هغه کسان د اخراج لومړیتوب لری چې د جرم سابقه ولری او محکمه یې د ایستلو حکم صادر کړی وی. نصیری زیاته کړه چې که څوک جرمی سابقه ونه لری، نو د اخراج اندېښنه ورته نشته.

په پای کې، سپوژمی نصیری مهاجرینو ته سپارښتنه وکړه چې که د قانون د پلی کوونکو چارواکو سره مخ شی، باید ټول قانونی اسناد له ځان سره ولری.

دا سمینار په داسې حال کې ترسره شو چې د وروستیو ټاکنو پر مهال، دونالد ټرمپ اعلان کړی و چې د نویو مهاجرتی سیاستونو د پلی کولو نیت لری، او له متحده ایالاتو څخه به د جرم لرونکو او بې اسناده مهاجرینو پراخ اخراج ترسره کړی.