پخواني پوځيان او د امریکا چارواکي: ټرمپ دې د افغانستاني اتباعو د بیا میشتېدو بهیر ته دوام ورکړي
واشنګټن ډي سي – سلګونو پخوانیو امریکايي پوځیانو، اوسنیو او پخوانیو چارواکو له ولسمشر ډونالډ ټرمپ څخه غوښتنه کړې چې د هغو افغانانو لپاره ځانګړي اسکان پروګرامونه وساتي، چې د امریکا له حکومت سره یې د ۲۰ کلنې جګړې پر مهال همکاري کړې او اوس د طالبانو له غچ اخیستو سره مخ دي.
دا لیک، چې د پخوانیو پوځیانو، چارواکو او نورو کسانو لخوا لاسلیک شوی، ټرمپ او د کانګرس مشرانو ته استول کېږي. د دې لیک تنظیم AfghanEvac ائتلاف کړی، چې د هغو سازمانونو مخکښ ائتلاف دی چې له امریکا حکومت سره د افغان اتباعو د اسکان او د نوي ژوند د پیلولو لپاره مرسته کوي.
په دې لیک کې راغلي: “موږ له افغان ژباړونکو، سرتېرو او هغو کورنیو سره نږدې همکاري کړې، چې خپل ژوند یې زموږ د ساتنې او لارښوونې لپاره په خطر کې اچولی. که اوس دوی یوازې پرېږدو، دا به زموږ د هغو ارزښتونو سره خیانت وي، چې موږ د دفاع لپاره جګړه کړې او د کلونو ګډو قربانیو له لارې مو ترلاسه کړي دي.”
د نوروز خبرپاڼه
دغه لیک له ټرمپ او د کانګرس له مشرانو غوښتنه کوي، چې د هغو افغانانو د بیا میشتېدو مالي ملاتړ ته دوام ورکړي، چې له خطر سره مخ دي، او همداراز له کانګرس غواړي چې ۵۰,۰۰۰ نور د ځانګړې مهاجرت ویزې (SIV) تصویب کړي.
اوسنی حد د SIV ویزو لپاره ۵۰,۵۰۰ دی، چې اټکل کېږي د دوبي په وروستیو یا د مني په لومړیو کې به پای ته ورسېږي.
د ټرمپ د انتقال ټیم تر اوسه د دې غوښتنې په اړه څه نه دي ویلي.
شاون واندایور، د AfghanEvac مشر، ویلي چې دا لیک دا اندېښنې منعکس کوي، چې ټرمپ ممکن د خپل سخت دریځه مهاجرتي سیاست برخه وګرځوي او د SIV او د پناه غوښتونکو د اسکان پروګرامونه کم یا لغوه کړي.
واندایور وویل: “یوه جدي اندېښنه دا ده، چې ولسمشر ټرمپ او سټیفن میلر به یو ځل بیا اداري خنډونه رامنځته کړي، چې د SIV او د پناه غوښتونکو د اسکان پروګرامونه ورو یا بند کړي، او زموږ افغان متحدین بیا یوازې پرېږدي.”
Hundreds of veterans, frontline civilians, & advocates have signed our open letter urging the incoming administration to honor America’s commitment to #Afghan allies.
Check out the @Reuters exclusive by @JonathanLanday https://t.co/bKYMzm7PoD
— #AfghanEvac (@afghanevac) January 8, 2025
میلر او د ټرمپ سخت دریځه مهاجرتي پالیسي
سټیفن میلر، چې د ټرمپ د لومړۍ دورې سخت دریځه مهاجرتي پالیسیو طراح و، تمه کېږي چې د ټرمپ په دوهمه دوره کې د ولسمشر د دفتر د مرستیال په توګه همدا رول ولوبوي.
پخواني امریکايي چارواکي او د مهاجرت مدافعین وایي، چې میلر د ټرمپ د لومړۍ دورې پر مهال اداري خنډونه، لکه “سخت امنیتي ارزونه” رامنځته کړې وه، چې د SIV پروګرام یې ورو کړی او د غوښتنلیکونو لوی شاته پاتې شوی سیسټم یې جوړ کړی و.
خو د ټرمپ نوی د ملي امنیت سلاکار، مایکل والتز، چې پخوا د امریکا د ځانګړو ځواکونو افسر و او په افغانستان کې یې دنده ترسره کړې، د SIV او د پناه غوښتونکو د اسکان د پروګرامونو کلک ملاتړ کړی دی.
ټرمپ د مهاجرت موضوع د خپل کمپاین اصلي برخه کړې
ټرمپ د ۲۰۲۴ کال د انتخاباتي مبارزې پر مهال مهاجرت د خپلې اجنډا یوه مهمه موضوع کړې وه او ژمنه یې کړې وه، چې د سرحدي امنیت به پیاوړی کړي او د بې ساري شمېر غیرقانوني مهاجرینو د اخراج لړۍ به چټکه کړي.
د خپلې لومړۍ واکمنۍ پر مهال، ټرمپ هڅه وکړه چې قانوني مهاجرت هم محدود کړي.
واندایور ویلي چې تر چهارشنبې ماښام پورې، دا لیک د ۳۸۰ پخوانیو پوځیانو، د امریکا د سنا فقید سناتور جان مککین زوی جک مککین، پخوانیو او اوسنیو فدرالي، ایالتي، محلي چارواکو، او ګڼو امریکایانو لاسلیک کړی دی.
دی به دا لیک د جنورۍ ۱۰ د جمعې په ورځ د ټرمپ ټیم ته واستوي، او راتلونکې اونۍ به یې د کانګرس جمهوري غوښتونکو او ډیموکرات مشرانو ته وسپاري.
د امریکا د بهرنیو چارو وزارت د راپور له مخې، په تېرو درې کلونو کې له ۱۸۳,۰۰۰ ډېر افغانان، چې له خطر سره مخ دي، د دوی کورنۍ د امریکا متحده ایالاتو ته انتقال شوي او اسکان شوي دي.
