کالیفورنیا ۳۰ زره دولتي دندې له پوهنتون سند د اړتیا څخه معاف کړې

والي نیوسوم ویلي چې د دې اقدام هدف د کالیفورنیا ټولو اوسېدونکو ته د کارموندنې دروازې پرانیستل، په ځانګړې توګه هغو کسانو ته دي چې د پوهنتون سند نه لري.

نیوسوم وویل: “هر کالیفورنیايي باید دا فرصت ولري چې د ژوند عملي مهارتونه زده کړي او د رضایت وړ مسلکي ژوند ولري – حتی که د پوهنتون سند ته اړتیا ونه لري. کالیفورنیا دا ډاډ ورکوي چې هر فرد ته د ښه او باثباته دندې د ترلاسه کولو لپاره لازم فرصتونه برابر شي.”

د پوهنتون د سند اړتیا لرې کول

د دې نوښت له مخې، نږدې ۳۰ زره دولتي دندې، چې مخکې یې د څلور کلن پوهنتون سند یا نورو زده‌کړیزو شرایطو ته اړتیا درلوده، نور د دې شرط تابع نه دي. د کالیفورنیا ایالت حکومت هدف لري چې د بېلابېلو مهارتونو لرونکو کسانو ته د کار موندلو فرصتونه برابر کړي، پرته له دې چې پوهنتون سند ته اړتیا ولري، او د کالیفورنیا د وګړو لپاره د کارموندنې پراخې دروازې پرانیزي.

راتلونکی ګام: تر ۲۰۲۵ کال پورې د بې سند دندو دوه برابره کول

دا نوښت په داسې حال کې مهم ګڼل کېږي، چې ګڼ شمېر کسان د مختلفو دلایلو له امله نه شي کولای پوهنتون ته لاړ شي. والي نیوسوم همداراز اعلان وکړ چې د دې برنامې هدف دا دی چې د هغو دندو شمېر دوه برابره کړي، چې د پوهنتون سند ته اړتیا نه لري.

د پلان له مخې، دا بدلونونه به تر ۲۰۲۵ کال پورې په بشپړ ډول عملي شي. دا هدف د کالیفورنیا د ایالت د پراخې اقتصادي ودې لپاره ټاکل شوی، چې موخه یې د کارموندنې زیاتوالی او د اقتصادي پرمختګ چټکول دي.

نیوسوم وویل: “موږ ویاړو چې د ایالت په شمال کې له خپلو سیمه‌ییزو شریکانو سره د مسلکي زده کړو د پراخولو لپاره همکاري کوو. د ‘کار لومړیتوب’ اقتصادي پروګرام په مرسته، موږ د نوې کاري لارې پرانیزو، ترڅو د کالیفورنیا سیمه‌ییز اقتصادونه پیاوړي کړو او له دې سره زموږ ټولنې ګټه واخلي.”

د پوهنتون سند لرونکو او نه لرونکو ترمنځ د کارموندنې نابرابري

شمېرې ښيي چې یوازې ۴۰ سلنه د کالیفورنیا خلک د پوهنتون سند لري، چې دا د هغو کسانو لپاره د کاري فرصتونو پر نشتوالي دلالت کوي، چې په مختلفو برخو کې مهارت لري، خو د پوهنتون زده‌کړې یې نه دي کړې.

د پوهنتون د سند د اړتیا لرې کولو سره، کالیفورنیا غواړي چې هغه کسان، چې د پوهنتون سند نه لري او له ډېرو کاري فرصتونو څخه محروم پاتې شوي، بېرته کار ته راستانه کړي. دا ګام په ځانګړې توګه د هغه وخت لپاره مهم ګڼل کېږي، کله چې د کالیفورنیا په اقتصاد کې د ماهرو کارکوونکو اړتیا ورځ تر بلې زیاتېږي.

د کاري مهارتونو لپاره د “کاري پاسپورت” نوښت

د دې بدلونونو ترڅنګ، والي نیوسوم د “کاري پاسپورت” په نوم یو نوی نوښت هم معرفي کړ. دا یو ډیجیټلي وسیله ده، چې کارکوونکو ته اجازه ورکوي چې خپل مهارتونه او تجربې د احتمالي کار ګمارونکو ته وښيي.

د کاري پاسپورت نوښت، په ځانګړې توګه، هغو کسانو ته ګټه لري چې د پوهنتون سند نه لري. دا به دوی ته فرصت ورکړي چې خپل مسلکي صلاحیتونه، کاري مهارتونه، داوطلبانه تجربې، او نظامي خدمتونه په رسمي توګه ثبت او کار ګمارونکو ته وړاندې کړي.

والي نیوسوم وویل: “دا وسیله به د خلکو لپاره اسانه کړي چې خپل مهارتونه وښيي او د ښه مسلکي راتلونکي لپاره زیات چانسونه ولري.”

د روښانه راتلونکي لپاره

والي نیوسوم زیاته کړه: “کالیفورنیا یو داسې اقتصاد جوړوي، چې ټولو کورنیو ته دا فرصت ورکړي، چې د خپل راتلونکي لپاره ښه بنسټ کېږدي. دا نوښتونه به د ټولو کالیفورنیايي وګړو لپاره دا لاره هواره کړي، چې خپل مهارتونه په بریالۍ کاري راتلونکې بدل کړي.”

په داسې حال کې چې د کار بازار ورځ تر بلې بدلېږي، او د نویو مهارتونو اړتیا مخ پر زیاتېدو ده، د مسلکي زده کړو نوښت او د دولتي دندو لپاره د پوهنتون د سند اړتیا لرې کول به کالیفورنیا ته دا زمینه برابره کړي، چې د عصري نړۍ له بدلونونو سره ځان برابر کړي، او ټولو خلکو ته د مسلکي پرمختګ مساوي فرصتونه برابر کړي.