د کالیفورنیا د کورنیو د ملاتړ پروګرام د ۱۷۵ کورنیو په ګډون ترسره شو

د جیره کالیفرنیا سازمان د کورنیو د ملاتړ پروګرام د ۱۷۵ تازه راغلو مهاجرو کورنیو په ګډون په سکرمنتو کې ترسره کړ.

د اضطراري ځواب ورکولو او نړیوالې مرستې سازمان (جیره) کالیفرنیا، د کورنیو د ملاتړ پروګرام د ۱۷۵ تازه راغلو مهاجرو کورنیو او ماشومانو په ګډون په سکرمنتو کې ترسره کړ.

دا غونډه، چې د مختلفو فعالیتونو څخه جوړه وه، د شعر ویلو، هنر معالجې، د عمومي معلوماتو سیالیو، د تازه راغلو کورنیو د اړتیاوو ارزونې، او د دې سازمان د کارکوونکو د تقدیر پروګرامونه یې شامل ول.

جیره کالیفرنیا په خپل فېسبوک پاڼه کې اعلان کړی چې ځوانانو په دې غونډه کې د هنر معالجې ورکشاپونو او ډله‌ییزو بحثونو کې ګډون وکړ، او خپل احساسات یې د رنګ او انځورګرۍ له لارې څرګند کړل.

د دې سازمان په وینا، راتلونکي کال کې به د دوی فعالیتونه لا پراخ شي، چې د محرومو ټولنو لپاره به په صحت، د ښځو د توانمندسازۍ، مسلکي روزنې، روبوټیک، د فوټبال تورنمنټونو، د موټر چلولو کورسونو، او د انګلیسي ژبې د زده کړې صنفونو باندې تمرکز وکړي.

جیره کالیفرنیا په دې غونډه کې ځینو اړمنو کورنیو ته مرستې هم وېشلې دي.