سپوژمي نصیري: تازه راغلي مهاجرین دې د ټرمپ د حکومت د مهاجرتي ستونزو لپاره چمتو واوسي

د افغان مهاجرینو لپاره د حقوقي پوهاوي سمینار او د ټرمپ د حکومت د مهاجرتي پالیسیو لپاره چمتووالی، په حضوري او آنلاین بڼه د کالیفورنیا ایالت په پلیزنتن ښار کې ترسره شو.

دا غونډه د افغان-امریکایي ټولنیز سازمان له لوري د خلیج ختیځې سیمې د مسلمانو ټولنیز مرکز کې تنظیم شوې وه، چې پکې یو شمېر تازه راغلي افغان مهاجرین، چې د آلامدا ولسوالۍ اوسیدونکي دي، برخه اخیستې وه.

عمر عزیز، د افغان-امریکایي ټولنیز سازمان اجرائیوي رئیس، د دې سمینار هدف د تازه راغلو مهاجرینو د قانوني پوهاوي زیاتول وبلل. هغه وویل چې دا غونډه د مهاجرینو لپاره ګټوره وه، څو خپل حقوق وپیژني او هغه اقدامات ترسره کړي چې د دوی قانوني وضعیت ته خوندي پاتې شي.

سپوژمي نصیري، د مهاجرتي چارو وکیله، د دې سمینار اصلي ویناواله وه. هغې په ځانګړي ډول هغو مهمو ټکو ته اشاره وکړه چې د مهاجرینو لپاره د قانوني حضور لپاره اړین دي. نصیري خبرداری ورکړ چې د ټرمپ د واکمنۍ پر مهال به د مهاجرت وضعیت لا پیچلی شي، او مهاجرین باید د لا زیات محدودیتونو او د خپلو قضیو د ارزونې د اوږده بهیر توقع ولري.

هغې زیاته کړه چې د خپل قانوني موقف د ساتلو لپاره، تازه راغلي مهاجرین باید د خپلې بشري ویزې د تمدید، د پناه غوښتنې، او د استوګنې دایمي اسنادو ترلاسه کولو ته جدي پاملرنه وکړي. دا اقدامات به هغوی ته دا اسانتیا برابره کړي چې خپل قانوني موقف وساتي او په متحده ایالاتو کې د پاتې کېدو قانوني حق ولري.

سپوژمي نصیري د تازه راغلو مهاجرینو هغه اندېښنې هم یادې کړې چې له امریکا څخه د احتمالي ایستلو په اړه یې لري. هغې وضاحت ورکړ چې د امریکا د مهاجرتي قوانینو له مخې، د مهاجرینو د اخراج بهیر اوږد دی، او یوازې هغه کسان د اخراج لومړیتوب لري چې د جرم سابقه ولري او محکمه یې د ایستلو حکم صادر کړی وي. نصیري زیاته کړه چې که څوک جرمي سابقه ونه لري، نو د اخراج اندېښنه ورته نشته.

په پای کې، سپوژمي نصیري مهاجرینو ته سپارښتنه وکړه چې که د قانون د پلي کوونکو چارواکو سره مخ شي، باید ټول قانوني اسناد له ځان سره ولري.

دا سمینار په داسې حال کې ترسره شو چې د وروستیو ټاکنو پر مهال، دونالد ټرمپ اعلان کړی و چې د نویو مهاجرتي سیاستونو د پلي کولو نیت لري، او له متحده ایالاتو څخه به د جرم لرونکو او بې اسناده مهاجرینو پراخ اخراج ترسره کړي.