د کالیفورنیا کې د ۲۰ نوی مهاجرینو د بریا لمانځنه

د کالیفورنیا د سکرمنتو ښار کې د ۲۰ نوی افغان مهاجرینو د بریا او لاسته راوړنو د ستایلو لپاره ځانګړی مراسم ترسره شو، چې پکې دوی ته د ځانګړو جایزو ورکولو سره لمانځنه وشوه.

دا برنامه د مس ټولنیزو خدماتو بنسټ له‌خوا د دې لپاره جوړه شوې وه، چې د بریالیو مهاجرینو پېژندنه وشی او د مهاجرت په ژوند کې د ذهنی روغتیا ارزښت ته پاملرنه وشی. په دې مراسمو کې هغه کسان وستایل شول، چې په لنډ وخت کې یې د خپل نوی ټولنیز چاپېریال سره د تطابق په برخه کې لاسته راوړنې درلودې.

ګلشن یوسفزی، د مس ټولنیزو خدماتو بنسټ رئیس، په دې مراسمو کې وویل، چې دا برنامه د هغو مهاجرینو د بریا د لمانځلو لپاره ده، چې له اګست ۲۰۲۱ وروسته امریکا ته راغلی دی. دا یو فرصت دی، چې وښیی، نوی مهاجرین څنګه کولای شی له مهاجرت سره اړوند چیلنجونو ته ځواب ووایی او په یوه نوی ټولنه کې ځان ته د ژوند باثباته لاره پیدا کړی. هغه زیاته کړه، چې دا ډول مراسم د هغو کسانو پېژندلو ته هم زمینه برابروی، چې د خپلو ټولنو لپاره الهام‌بښونکی رول لری.

یوسفزی وویل، چې د مس بنسټ د ارزونې پلاوی ۲۰ نوی مهاجرین وټاکل، چې په بیلابیلو برخو کې یې د پام وړ لاسته راوړنې لرلې. دا کسان د یو ځانګړی کنفرانس په ترڅ کې، چې له ۳۰۰ ډېرو مهاجرینو او د ټولنې د مشرانو په حضور کې ترسره شو، وستایل شول او هغوی ته جایزې ورکړل شوې.

ډاکټر فرید یونس، د کالیفورنیا ایالت د ختیځ بی پوهنتون پخوانی استاد، د دې برنامې په ترڅ کې د مهاجرت په بریا کې د ذهنی روغتیا د ارزښت په اړه وینا وکړه. هغه ټینګار وکړ، چې د مهاجرت پر مهال د فزیکی او ذهنی روغتیا پالنه حیاتی ارزښت لری. یونس زیاته کړه، چې نوی مهاجرین باید د امریکا د ټولنې ارزښتونه، اصول، او ټولنیز سیستم زده کړی، خپل اهداف وټاکی، او د خپلو ځانونو او کورنیو د لا بریا لپاره له موجودو فرصتونو څخه ګټه واخلی.

سکرمنتو، د کالیفورنیا پایتخت، د افغانستان تر ټولو لویې مهاجرې ټولنې ته کوربه‌توب کوی، چې دا ټولنه په چټکۍ سره وده کوی. ګڼ شمیر افغان مهاجرین توانېدلی، چې د زده‌کړو، سوداګرۍ، او ټولنیزو فعالیتونو په برخو کې د پام وړ لاسته راوړنې ولری. دا برنامه، یو فرصت وو، چې د هغوی هڅې وستایل شی او د هغوی مثبت رول لا روښانه شی.