د کالیفورنیا کې د ۲۰ نوي مهاجرینو د بریا لمانځنه

د کالیفورنیا د سکرمنتو ښار کې د ۲۰ نوي افغان مهاجرینو د بریا او لاسته راوړنو د ستایلو لپاره ځانګړی مراسم ترسره شو، چې پکې دوی ته د ځانګړو جایزو ورکولو سره لمانځنه وشوه.

دا برنامه د مس ټولنیزو خدماتو بنسټ له‌خوا د دې لپاره جوړه شوې وه، چې د بریالیو مهاجرینو پېژندنه وشي او د مهاجرت په ژوند کې د ذهني روغتیا ارزښت ته پاملرنه وشي. په دې مراسمو کې هغه کسان وستایل شول، چې په لنډ وخت کې یې د خپل نوي ټولنیز چاپېریال سره د تطابق په برخه کې لاسته راوړنې درلودې.

ګلشن یوسفزی، د مس ټولنیزو خدماتو بنسټ رئیس، په دې مراسمو کې وویل، چې دا برنامه د هغو مهاجرینو د بریا د لمانځلو لپاره ده، چې له اګست ۲۰۲۱ وروسته امریکا ته راغلي دي. دا یو فرصت دی، چې وښيي، نوي مهاجرین څنګه کولای شي له مهاجرت سره اړوند چیلنجونو ته ځواب ووایي او په یوه نوي ټولنه کې ځان ته د ژوند باثباته لاره پیدا کړي. هغه زیاته کړه، چې دا ډول مراسم د هغو کسانو پېژندلو ته هم زمینه برابروي، چې د خپلو ټولنو لپاره الهام‌بښونکي رول لري.

یوسفزی وویل، چې د مس بنسټ د ارزونې پلاوي ۲۰ نوي مهاجرین وټاکل، چې په بیلابیلو برخو کې یې د پام وړ لاسته راوړنې لرلې. دا کسان د یو ځانګړي کنفرانس په ترڅ کې، چې له ۳۰۰ ډېرو مهاجرینو او د ټولنې د مشرانو په حضور کې ترسره شو، وستایل شول او هغوی ته جایزې ورکړل شوې.

ډاکټر فرید یونس، د کالیفورنیا ایالت د ختیځ بی پوهنتون پخوانی استاد، د دې برنامې په ترڅ کې د مهاجرت په بریا کې د ذهني روغتیا د ارزښت په اړه وینا وکړه. هغه ټینګار وکړ، چې د مهاجرت پر مهال د فزیکي او ذهني روغتیا پالنه حیاتي ارزښت لري. یونس زیاته کړه، چې نوي مهاجرین باید د امریکا د ټولنې ارزښتونه، اصول، او ټولنیز سیستم زده کړي، خپل اهداف وټاکي، او د خپلو ځانونو او کورنیو د لا بریا لپاره له موجودو فرصتونو څخه ګټه واخلي.

سکرمنتو، د کالیفورنیا پایتخت، د افغانستان تر ټولو لویې مهاجرې ټولنې ته کوربه‌توب کوي، چې دا ټولنه په چټکۍ سره وده کوي. ګڼ شمیر افغان مهاجرین توانېدلي، چې د زده‌کړو، سوداګرۍ، او ټولنیزو فعالیتونو په برخو کې د پام وړ لاسته راوړنې ولري. دا برنامه، یو فرصت وو، چې د هغوی هڅې وستایل شي او د هغوی مثبت رول لا روښانه شي.