ټرمپ د زیږون له لارې تابعیت ختموي
واشنګټن، د جنورۍ ۲۰، ۲۰۲۵ – د سپینې ماڼۍ د راپور له مخې، د امریکا د متحده ایالاتو ولسمشر، دونالد ټرمپ، یو نوی اجرائیوي فرمان صادر کړی، چې په متحده ایالاتو کې د زیږون له لارې د تابعیت ترلاسه کولو پروسه محدودوي.
د زیږون له لارې تابعیت د امریکا د اساسي قانون د ۱۴م تعدیل له مخې تضمین شوی، چې وایي: “ټول هغه کسان چې په متحده ایالاتو کې زیږیدلي وي، د امریکا تابعیت ترلاسه کوي.”
د دې اجرائیوي فرمان پر بنسټ، دا بدلونونه په ځانګړي ډول هغو ماشومانو ته تطبیقېږي چې میندې یې د دوی د زیږون پر مهال په امریکا کې د غیرقانوني یا مؤقتي وضعیت لاندې ژوند کاوه، او پلرونه یې د امریکا تابع یا قانوني اوسېدونکي نه وو.
د نوروز خبرپاڼه
په فرمان کې راغلي چې دا محدودیتونه به یوازې هغو کسانو ته تطبیق شي چې د دې فرمان له نافذېدو وروسته، یعنې د ۳۰ ورځو دننه، په متحده ایالاتو کې زیږېدلي وي.
ټرمپ په دې فرمان کې ټینګار کړی چې د دې بدلونونو موخه دا ده چې د تابعیت ورکولو مخه ونیسي، څو هغه کسان چې ممکن د امریکا لپاره قانوني یا امنیتي ستونزې رامنځته کړي، تابعیت ترلاسه نه کړي.
هغه همداراز اعلان کړی چې دا پالیسي په هغو کسانو باندې هیڅ اغېز نه لري، چې له دې وړاندې د امریکا قانوني تابعیت ترلاسه کړی وي.
د امریکا حکومت د بهرنیو چارو وزارت، د کورني امنیت وزارت، لوی څارنوال، او نور اړوندې ادارې مکلفې کړې دي چې د دې اجرائیوي فرمان د عملي کولو لپاره لازمي اقدامات ترسره کړي.
همداراز، ټاکل شوې چې د دې فرمان د تطبیق لپاره راهنمايي او اجرايي مقررات د راتلونکو ۳۰ ورځو دننه خپاره شي.
دا اجرائیوي فرمان د امریکا د مهاجرینو او پناه غوښتونکو د منلو پر پروسه پراخ اغېز کولی شي، او احتمال لري چې د امریکا دننه او بهر بیلابیل غبرګونونه را وپاروي.
