د افغانستان کډوالو د ستونزو د ارزولو ناسته په کالیفورنیا کې
په کالیفورنیا ایالت، د سکرمنتو په ښار کې یوه غونډه د افغانستان کډوالو د ستونزو او خنډونو د ارزولو په موخه ترسره شوه.
دغه غونډه، چې د “د افغانانو د امید انجمن” له خوا تنظیم شوې وه، د کډوالو د ټولنې یو شمېر مشران، د کډوالو ملاتړ کوونکو ادارو استازی او د ایالت یو شمېر چارواکی پکې ګډون درلود.
جعفر واحدی، چې د “د افغانانو د امید انجمن” مشر دی، وویل چې دوی دا ناسته د افغانستان د کډوالو، په ځانګړې توګه د هغو کسانو ستونزې د ارزولو لپاره جوړه کړې وه، چې قانونی اسناد نه لری. همداراز، د شته سرچینو د بسیج کولو لپاره یې هڅه وکړه، تر څو دغه خنډونه حل شی.
د نوروز خبرپاڼه
هغه زیاته کړه چې د کالیفورنیا د ایالتی حکومت، د خدمتونو ورکونکو ادارو، او د افغانستان د کډوالو ټولنې ترمنځ د همغږۍ او همکارۍ رامنځته کول خورا مهم دی.
برهان نبی زاده، چې د سکرمنتو د کډوالو ټولنې له مشرانو او د “د افغانانو د امید انجمن” د مشرتابه غړی دی، وویل چې د کار موندلو فرصتونو کمښت، د نوو کډوالو، په ځانګړې توګه د هغو کسانو لپاره چې قانونی اسناد نه لری، د معیشت ستونزې، د امریکا له قوانینو د نه پوهاوی ستونزه، او د ذهنی روغتیا مشکلات د دې ټولنې له اساسی ننګونو څخه دی، چې باید ورته رسېدنه وشی.
په ورته وخت کې، مولوی فدا محمد طاهری، چې د سکرمنتو په ښار کې د امام ابوحنیفه مسجد خطیب دی، وویل چې د امریکا ګڼ شمېر ادارې، چې د کډوالو د ملاتړ ادعا لری، د کالیفورنیا د افغانستانی کډوالو ټولنې اړتیاوو ته کافی پاملرنه نه کوی.
د غونډې یو شمېر نورو ویناوالو د ایالتی دولت او د کډوالو ملاتړ کوونکو ادارو ته وړاندیزونه وکړل، تر څو د کډوالو ستونزو ته، په ځانګړې توګه د نوو راغلو کسانو ته، رسیدګی وشی.
دغو وړاندیزونو کې لاندې موضوعات شامل وو:
- د کډوالو لپاره د امریکا د قوانینو او حقوقی سیستمونو د زده کړې تعلیمی پروګرامونه برابرول؛
- د پایدارو اقتصادی او کاری فرصتونو رامنځته کول؛
- هغو مهاجرینو ته د قانونی اسنادو ترلاسه کولو پروسه اسانه کول، چې قانونی سندونه نه لری؛
- بېاسنادو کډوالو ته د بیړنیو مرستو برابرول؛
- د ذهنی روغتیا، مشورې او کلتوری ورکشاپونو تنظیمول.
د غونډې ګډونوالو ټینګار وکړ چې باید د کډوالو د اړتیاوو د پوره کولو لپاره منظمې هڅې وشی، تر څو دوی د نوې ټولنې سره ښه عیار شی او له اقتصادی او ټولنیزو فرصتونو څخه ګټه پورته کړی.
د سکرمنتو ښار، چې د کالیفورنیا د ایالت پلازمینه ده، د دې ایالت د افغانستانی کډوالو تر ټولو لویه ټولنه لری او د دوی د ژوندانه په بېلابېلو برخو کې مهم رول لوبوی. د کالیفورنیا ایالت کې د افغانستان کډوالو شمېر ورځ تر بلې د زیاتوالی په حال کې دی، چې دا موضوع د دولت او محلی ادارو له خوا ځانګړې پاملرنې ته اړتیا لری.
دا غونډه د افغانستانی کډوالو د ټولنې د غړو، د هغوی د ملاتړ کوونکو ادارو، او دولتی چارواکو ترمنځ د بحث او نظریو د تبادلې لپاره یوه مهمه بستر وبلل شوه. ګډونوالو د کډوالو د اړتیاوو، ستونزو، او د حللارو په اړه پراخې خبرې وکړې.
د دې ناستې تنظیموونکو هیله وښوده چې د دې غونډې پایلې به د کالیفورنیا په ایالت کې د افغانستانی کډوالو د ژوند شرایطو د ښه والی سبب شی، او د داسې مؤثرو ملاتړیو پروګرامونو د رامنځته کېدو ته لاره هواره کړی، چې د دې ټولنې د ستونزو هوارولو کې مرسته وکړی.
