کالیفورنیا د پیاده رو کرښې ته نږدې د پارکینګ بندیز ولګاوه.

د کالیفورنیا د یو نوي قانون له مخې، د ۲۰۲۵ کال د جنورۍ له لومړۍ نېټې څخه د څلورلارې د پیاده رو کرښې څخه د ۲۰ فوټو (شاوخوا ۶ متره) په فاصله کې د موټر پارک کول منع شوي دي.

دا قانون، چې د مجلس د لایحې شمېره ۴۱۳ په نوم یادیږي، د موټر چلوونکو او پیاده عابرینو د ښه لید لپاره تصویب شوی، او د کالیفورنیا د والي گاوین نیوسام لخوا لاسلیک شوی دی.

په کالیفورنیا کې د لوړ شاسی لرونکو موټرو او لویو باروړونکو موټرو زیاتوالي د دې سبب شوی و چې د پیاده رو کرښو او څلورلارو لید کم شي، همداراز کوچني موټرونه هم د لید محدودیت سره مخ شوي وو.

د AB 413 لایحه د سړک تر څنګ د ۲۰ فوټو د خالي ساحې د رامنځته کولو غوښتنه کوي، تر څو موټرونه نور نشي کولی چې دې ساحې ته نږدې پارک شي، په ځانګړي ډول په هغو سیمو کې چې پیاده رو کرښو ته نږدې دي. دا بندیز د مشخصو او غیرمشخصو پیاده رو کرښو دواړو لپاره تطبیق کیږي.

دا نوی قانون په ټول ایالت کې پلي شوی او د ۲۰۲۵ کال د جنورۍ له لومړۍ څخه د مارچ تر لومړۍ پورې د ۶۰ ورځو د انتقال موده ورکول شوې، ترڅو چلوونکي د نوي مقرراتو سره عادت شي. د دې قانون د سرغړونې جریمه ۶۵ ډالره ټاکل شوې، چې ورسره ۱۲.۵۰ ډالره اضافي فیس هم اضافه کیږي، چې ټولټال ۷۷.۵۰ ډالره کیږي. دا جریمه د عادي پارکینګ جریمو څخه لوړه ده، خو د هغو جریمو څخه ټیټه ده چې د سرې کرښې سره د پارک کولو لپاره ټاکل شوي دي.

دا لایحه د کالیفورنیا د ایالتي مجلس غړي، الکس تیانمینګ لی، ترتیب کړې ده.

الکس لی په یوه بیان کې ویلي: “لایحه AB 413 به د خلکو ژوند وژغوري او سړکونه د ټولو لپاره خوندي کړي. د دې قانون لاسلیک د سړک د خوندیتوب د ښه والي لپاره یو ساده خو مهم ګام دی. د کالیفورنیا د پیاده عابرینو د مړینې کچه د ملي اوسط څخه ۲۵ سلنه لوړه ده. د سړکونو د لید د ښه کولو له لارې، دا لایحه به د مرګونو پېښو د مخنیوي لپاره مرسته وکړي.”